Ny mampiavaka ny mpanompon’ Andriamanitra
Mofonaina anio:
Alarobia, faha 22 Aprily 2026
Sal 9 / Hira 638 / Vavaka / Mofonaina / Vavaka / Hira 760
Eksodosy 17,8 – 16
8 Ary tonga ny Amalekita ka niady tamin’ny Isiraely tao Refidima.
9 Dia hoy Mosesy tamin’i Josoa: Mifidiana lehilahy ho antsika, dia mandehana ka miadia amin’ny Amalekita; rahampitso dia hijoro eo an-tampon’ny havoana aho ka hitana ny tehin’Andriamanitra et? an-tanako.
10 Ary Josoa dia nanao araka izay efa nolazain’i Mosesy taminy, ka niady tamin’ny Amalekita izy; ary Mosesy sy Arona sy Hora kosa niakatra ho ao an-tampon’ny havoana.
11 Ary raha nasandratr’i Mosesy ny tànany, dia nahery ny Isiraely; fa raha nampidininy ny tànany, dia nahery kosa ny Amalekita.
12 Fa efa vizana ny tanan’i Mosesy; ka dia naka vato izy roa lahy, ka nataony teo ambanin’i Mosesy hipetrahany; ary Arona sy Hora dia nanohana ny tànany, ka ny iray tamin’ny anila, ary ny iray kosa tamin’ny anila; dia naharitra tsy nidina intsony ny tànany mandra-pahafatin’ny masoandro.
13 Ary Josoa dia nandresy ny Amalekita sy ny olony tamin’ny lelan-tsabatra.
14 Ary hoy Jehovah tamin’i Mosesy: Soraty eo amin’ny boky izany ho fahatsiarovana, ka ambarao amin’i Josoa; fa hofoanako tokoa ny fahatsiarovana ny Amalekita tsy ho eny ambanin’ny lanitra.
15 Dia nanorina alitara Mosesy ka nanao ny anarany hoe: Jehovah Nisi.
16 Fa hoy izy: Jehovah nianiana hoe: Ny adin’i Jehovah amin’ny Amalekita dia tsy hitsahatra hatramin’izay taranany fara mandimby.
Ny mampiavaka ny mpanompon’ Andriamanitra
1-Manaraka fandaminana
« Ary Josoa dia nanao araka izay nolazain’i Mosesy taminy » (and10): Nibaiko an’i Josoa i Mosesy mba hifidy lehilahy, handeha ka hiady amin’ny Amalekita. Ny Amalekita dia nampahory ny vahoakan’ Andriamanitra. Tsy niady hevitra na nisalasala i Josoa fa nanatanteraka. Izay kristiana na Fiangonana mahay mihaino sy manaraka ny toromarika omen’ny mpitarika azy dia handroso tokoa. Anjarantsika àry ny manaraka an-tsakany sy an-davany ny baiko izay omen’i Jesoa Tompontsika. Tanteraho ny fanompoanao.
2-Manohana sy manampy ny mpitarika azy
« Ary Arona sy Hora dia nanohana ny tànany, ka ny iray tamin’ny anila, ary ny iray kosa tamin’ny anila » (and12): Mitazona, manampy tsy hihintsana na hianjera no hevitry ny hoe: « manohana » eto. Tsy navelan’i Arona sy Hora hiady irery i Mosesy. Tsy maintsy manampy ny mpitarika isika. Mivavaka ho azy ireo, mitondrà soso-kevitra mampahery, miombona, eny manampy amin’ny lafiny rehetra. Aza avela handalo fotsiny àry ireo fotoana manokana hitondrana am-bavaka azy ireo. Araraoty ny andro azo hanaovan-tsoa fa miharatsy izao fiainana izao.
3-Mahazo fandresena miezinezina
« Ary Josoa dia nandresy ny Amalekita sy ny olony » (and13): Isan’ny fanalahidin’ny fandresena ny fanarahana fandaminana, ny fifanohanana. Mampiavaka antsika Malagasy ny firaisan-kina eo ambany fitarihan’ny Fanahy Masina. Mijoroa, ary aoka ho mpandresy hatrany.
Fanontaniana
Ahoana no atao mba handresena ireo fahavalo?
Foibe Sampana Sekoly Alahady
0 Commentaires