Mihainoa ny Tenin’ny Tompo 

1 Samoela 15.16-29

Ny olona mihaino ny Tenin’ Andriamanitra

1-Tsy  maintsy mankato

Tsy  nandray  ny toromarika  nambaran’i Samoela  i Saoly mpanjaka . Nihevitra   ny tenany ho nanan-tsaina ambony , ary nahazo  sambobelona  an’i Agaga mpanjakan’i Amalekita  ka nanao fanatitra  ho an’ Andriamanitra tamin’ireo  biby  heveriny  ho tsara  sy matavy. Diso hevitra  izy noho izany  , nihaino  fotsiny   fa tsy nanatanteraka ny toromarika  nomen’ Andriamanitra  fa tokony   haringana  ny Amalekita  sy ny fananany  . Tsy nankasitrahan’ Andriamanitra  ny zavatra nataony  . Tsarovy  fa ianao  mankato ny Tenin’ Andriamanitra no zava-dehibe  fa tsy   ny fanatitra   entinao   na dia heverina ho  tsara  indrindra aza.

2-Tsaraina

Noho  ny tsy fanakatoavana  ny  Tenin’ Andriamanitra   dia niharan’ny sazy  i Saoly mpanjaka . Nolavin’ Andriamanitra  ny maha- mpanjaka  azy . Tsy azo vazivaziana  ny  Tompo , eny   fa na dia  niaiky  ny fahadisoany  , nifona  noho ny fahotana  nataony aza izy  dia mazava  ny fanapahan-kevitr’ Andriamanitra . Esoriny amin’ny fanjakana i Saoly  . Efa  misy  olona  voaomana   handimby  azy eo   amin’ny fanjakana. Ataovy  ho zava-dehibe  hatrany eo  amin’ny fiainanao  ny Tenin’ Andriamanitra , ankatoavy  , iaino  izay ambarany   aminao   dia ho  azo antoka ny ho avinao .

Fanontaniana:

Nahoana  no misy  olona manao   ho ambony   ny feon’ny fieritreretany na ny olona  akaiky  azy noho ny Tenin’ Andrtiamanitra ?